Skessuhorn:

Þjóðfundurinn er á morgun

13. nóvember 2009

Á morgun, laugardaginn 14. nóvember, verður einstakur viðburður í Laugardalshöll í Reykjavík. Þá verður þjóðfundurinn haldinn, sem í kynningum og fréttum að undanförnu hefur oft verið líkt við mauraþúfuna. Þjóðfundinum er ætlað að verða vettvangur til að ná samstöðu um það sem þjóðinni er til heilla. Fyrri hluti fundarins er helgaður spurningunni: Hvaða lífsgildi viljum við hafa að leiðarljósi við þróun samfélagsins og hvernig viljum við hafa Ísland framtíðarinnar? Síðari hlutinn fjallar um á hvaða meginstoðum þessi framtíðarsýn á að hvíla.

Á fundinn á morgun er stefnt marktæku úrtaki þjóðarinnar, 1500 manns sem valdir voru með slembiúrtaki úr þjóðskrá, til að leita nýrra lausna og nýrra samstöðu. Markmið þeirra sem standa að viðburðinum er að virkja sameiginlegt innsæi og vitund almennings og hlusta eftir visku þjóðarinnar.

Í tilkynningu vegna þjóðfundarins segir að hann sé ekki hefðbundinn umræðufundur í ætt við pólitíska fundi eða borgarafundi. Þess í stað er þátttakendum skipt í hópa sem starfa saman. Umræðustjórar eiga að tryggja jafnræði í umræðum. Á þjóðfundinn hafa valist 1200 manns með slembiúrtaki og 300 fulltrúar fjölmargra stofnana, fyrirtækja og félagasamtaka til að tryggja að anda og niðurstöðum fundarins verði fylgt eftir. Bein útsending frá fundinum verður á slóðinni www.thjodfundur2009.